सुर्खेत । कर्णाली प्रदेशसभा सदस्यहरुले आज पद तथा गोपनीयताको सपथ ग्रहण गरेका छन् ।
ज्येष्ठ सदस्य विनोद कुमार शाहलाई प्रदेश प्रमुख तिलक परियारले र वाँकी सदस्यहरुलाई शाहले सपथ खुवाउनुभएको हो । शाह दैलेख निर्वाचन क्षेत्र नं. २ ख मा नेकपा एमालेबाट प्रदेशसभामा निर्वाचित हुनुभएको थियो ।
प्रदेश सभा सदस्य निर्वाचन ऐन, २०७४ मा प्रदेशसभामा निर्वाचित मध्ये ज्येष्ठ सदस्यलाई प्रदेश प्रमुख र बाँकी सदस्यहरुलाई ज्येष्ठ सदस्यले सपथ खुवाउन प्राब्धान रहेको छ ।
सपथग्रहपश्चात प्रदेशसभा सदस्यहरुले जनताको अपेक्षा पूरा गर्नेगरी आफ्नो भूमिका निर्वाह गर्ने बताएका छन् । जुम्लाबाट प्रदेशसभामा निर्वाचित टेक पछाईले प्रदेशसभामा उत्कृष्ट ऐन कानुन निर्माणमा भूमिका खेल्ने बताउनुभयो ।
यस्तै देलैखबाट निर्वाचित घनश्याम भण्डारीले राजनीतिक रुपमा संघीयता सफल भएपनि प्रशासनिक र वित्तिय रुपमा सफल हुन नसकेको भन्दै त्यसलाई सफल बनाउने कानुन निर्माणमा भूमिका खेल्ने बताउनुभयो । सुर्खेतकी नन्दा गुरुङले समृद्ध कर्णाली सुखी कर्णालीवासीको नारा सफल पार्न प्रदेशसभामा सशक्त भूमिका खेल्ने बताउनुभयो ।
हुम्लाकी जनकीतम लामाले समग्र महिला, जनजाति तथा पिछडिएको समुदायलाई अगाडी ल्याउन भूमिका निभाउने बताउनुभयो । डोल्पाका शेरबहादुर बुढाले कर्णाली प्रदेशको दीगो विकासका लागि विगतभन्दा फरक ढंगले सोचेर काम गर्ने बताउनुभयो । कर्णाली प्रदेशसभामा नेपाली काँग्रेसबाट १४, नेकपा माओवादी केन्द्रबाट १३, नेकपा एमालेबाट १० तथा राष्ट्रिय प्रजातन्त्र पार्टी, एकीकृत समाजवादी पार्टी र स्वतन्त्रबाट एक एक जनागरी ४० जना सदस्य निर्वाचित छन् । त्यसमध्य २४ जना प्रत्यक्ष र १६ जना समानुपातिक प्रणालीबाट निर्वाचित भएका हुन् ।