सुर्खेत । कर्णाली प्रदेश सभाको दोश्रो कार्यकालको पहिलो बैठक बसेको छ । आज प्रदेश सभाको दोस्रो कार्यकालको पहिलो अधिवेशनको पहिलो बैठकको कार्यसूचीहरूमध्ये दलका नेता तथा सांसदहरूले दलीय धारण राखेका छन् ।
पहिलो बैठकमा दलीय धारणा राख्ने सबै सांसदहरूले कर्णालीको समृद्धिका लागि प्रदेश सभामा सहभागी दलहरूले सहमति र सहकार्यका माध्यमबाट अघि बढ्नुपर्नेमा जोड दिएका छन् ।
कर्णाली प्रदेश कर्णालीका मुख्यमन्त्री तथा नेपाली कांग्रेस संसदीय दलका नेता जीवनबहादुर शाहीले कर्णाली विपक्ष भनेकै रोग, भोक र पछौटेपन भएको बताउनुभयो ।
उहाँले मुलुकको राजनीतिक परिस्थिति जुन बाटोमा गए पनि कर्णालीमा एक भएर लाग्नुपर्ने बताउनुभयो ।
उहाँले प्रदेश सभाको दोस्रो कार्यकालमा सदस्यहरूले जनताका लागि काम गरेका छन् भन्ने महसुस गराउनुपर्नेमा जोड दिनुभयो । यस्तै, नेकपा एमाले संसदीय दलका नेता यामलाल कँडेलले अहिले पनि कर्णाली प्रदेश सबै सूचकांकमा पछि परेकाले यसलाई सुधार गर्नतर्फ अघि बढ्न आग्रह गर्नुभयो ।
अघिल्लो पाँच वर्षको कार्यकालमा कर्णाली प्रदेश सभाले नकारात्मक सूचकांकलाई प्रभावित पार्न नसकेको उहाँले बताउनुभयो । उहाँले स्थापना गरेको प्रदेश संरचनाको औचित्य पुष्टि हुने गरी सबै अगाडि बढ्न अवश्यक रहेको बताउनुभयो ।
जनताले प्रदेशको एक कार्यकालको अनुभव गरेर अर्को कार्यकालका लागि सांसद चुनेर पठाएको बताउँदै उहाँले आफ्नो र आफ्नो दलको जीतलाई जनताको जितका रूपमा लिएको बताएको छ ।
यस्तै, नेकपा माओवादी केन्द्रका संसदीय दल नेता राजकुमार शर्माले समृद्ध समाज निर्माण गर्ने मुख्य उद्देश्यका साथ अघि बढ्नुपर्नेमा जोड दिनुभयो । उहाँले प्रदेशभित्रका प्रशासनिक समस्या समाधान गर्न संसदबाट भूमिका खेल्नुपर्ने उल्लेख गर्नुभयो ।
राष्ट्रिय प्रजातन्त्र पार्टीका सांसद सन्तोषी शाहीले अहिले देखा परेको भ्रष्टाचारको अन्त्य गर्न बलियो कानुन बनाउन दलहरूले सहकार्य गर्नुपर्ने बताउनुभयो ।
यस्तै, जुम्लाबाट निर्वाचित स्वतन्त्र सांसद देवेन्द्रबहादुर शाहीले सांसदहरू नेताप्रतिभन्दा पनि जनताप्रति उत्तरदायी हुनुपर्ने बताउनुभयो ।
उहाँले सहकार्य र सहमतिका साथ अघि बढ्नुपर्ने भन्दै कर्णाली समृद्धिका लागि सहकार्य हुनुपर्ने बताउनुभयो ।
यस्तै, कर्णाली प्रदेश सभाको अर्को बैठक पुस २५ गते दिउँसो १ बजे बस्ने भएको छ ।