सुर्खेत । सुर्खेतको वीरेन्द्रनगरका स्वास्थ्यकर्मीहरुले ८ महिनादेखि तलबभक्ता पाउन सकेका छैनन् ।
वीरेन्द्रनगर नगरपालिका स्वास्थ्य शाखा र अन्य स्वास्थ्य चौकीहरुमा कार्यरत स्वास्थ्यकर्मीले आफूले काम गरे बापतको आठ महिनादेखिको तलब पाउन नसकेको बताएका हुन् ।
अझैपनि तलब भत्ता नपाए आन्दोलन गर्ने चेतावनी समेत दिएका छन् । अरू सेवाका कर्मचारीले दरबन्दी नभएपनि नगरपालिका अन्तर्गतका कर्मचारीले भने तलब भत्ता पाइरहेका छन् । तर, स्वास्थ्य मन्त्रालय अन्तर्गत रहेका स्थायी स्वास्थ्य कर्मचारीले तलब पाउन सकेका छैनन् ।
तलब नपाउँदा आफुहरुलाई घर खर्च टार्न समेत समस्या भएको स्वास्थ्यकर्मीहरुको भनाई छ । संवेदनशील सेवामा काम गर्ने स्वास्थ्यकर्मीहरुलाई करिब एक बर्षसम्म तलब नदिँदा आफुहरु पिडामा परेको सि अनमी राजेन्द्र कुमारी थापाले गुनासो गर्नुभयो ।
पटकपटक आफुहरुले कुरा राख्दा काज फिर्ता गर्ने भनिएको भन्दै उहाले त्यसमा आफुहरु सहमत हुन नसक्ने बताउनुभयो । अझै तलब नदिने हो भने कानुनी प्रक्रियामा आफुहरु जान बाध्य हुने उहाको भनाई छ ।
उहाले भन्नुभयो, “पहिले स्वास्थ्य मन्त्रालयले समायोजनमा पठाउने र नगरपालिकाले पनि तलब दिन सक्छौ भनेर राख्ने अहिले फेरी समायोजन फिर्ता गराउने भन्ने कदाबी मिल्दैन । हामीले खाइपाइ आएको तलब पनि पाउनुपर्छ ।”
नगरपालिकामा कर्मचारीले तलब भत्ता नपाउँदा कर्मचारी मारमा परेको उतरगङ्गा स्वास्थ्य चौकीमा कार्यरत सि अहेव उदय थापाले बताउनुभयो ।
सजिलो बनाउनेगरी स्वास्थ्य मन्त्रालयले समायोजनमा जाने निर्णय गरेको भन्दै अहिले आफुहरु जस्तै कर्मचारीहरुले तलब पाइरहेको तर आफुहरुले नपाएकोप्रति गुनासो गर्नुभयो ।
वीरेन्द्रनगर नगरपालिकाले तलब दिन्छौ भनेर पहिले कर्मचारी समायोजनमा लिने तर अहिले नेतृत्व पञ्छिएको उहाको गुनासो छ ।
उहाले भन्नुभयो, प्राथमिकता युक्त कार्यक्रम चलाई रहनु पर्ने, कोरोनाको महामारीमा रातदिन खटाउँदा पनि बिरामीको उपचारमा संलग्न भएका स्वास्थ्यकर्मीचारीहरुलाई स्थानीय सरकार र संघीय सरकारको चपेटामा पारेको छ । उहाको भन्नुभयो ।
यता, जन स्वास्थ्य अधिकृत भूपेन्द्रदेव गिरीले कर्मचारी समायोजन मिलान सम्बन्धी मापदण्ड २०७७ मा ३८ जना कर्मचारी स्वास्थ्य मन्त्रालयले पठाएको जानकारी दिनुभयो ।
त्यसपछि फेरि स्वास्थ्य मन्त्रालयले स्वास्थ्य सेवाका कर्मचारीहरूको समायोजन मिलान सम्बन्धी व्यवस्था २०७७ मा ५६ जना कर्मचारीलाई पठाएको गिरीको भनाई छ ।
स्वास्थ्य मन्त्रालयबाट २ करोड ६३ लाख बजेट ३८ जनालाई आएको भन्दै उहाल बजेट फेरी आउँछ भन्ने सोचले ९४ जना कर्मचारीलाई तलब खुवाइएको तर कात्तिकदेखि यता बजेट नआएपछि तलब खुवाउन नसकिएको जानकारी दिनुभयो ।–––