सुर्खेत । कर्णाली प्रदेश सरकारले प्रदेशका विभिन्न ठाउँमा पर्यटकीय केन्द्रहरुमा नमुना वस्ती निर्माण गर्ने भएको छ ।
आफ्नो बजेट कार्यक्रममा नै कर्णालीका विभिन्न पर्यटकीय ठाउँहरुमा नमुना वस्ती निर्माण गर्ने योजना अगाडी सारेको हो । संघिय सरकारसँगको सहकार्यमा नमुना वस्ती निर्माण गरिने जनाइएको छ ।
जस अन्तरगत सङ्घीय सरकारसँगको संयुक्त लगानीमा डोल्पाको शे–फोक्सुण्डो ताल किनारमा रहेको प्राचीन बस्ती रिङ्मोलाई बौद्ध कला र संस्कृतिको अनुपम बस्तीको रूपमा रूपान्तरण गर्ने योजना अगाडी सारिएको छ ।
नेपालको अद्वितीय प्राकृतिक तथा धार्मिक पर्यटकीय केन्द्रको रूपमा विकास गर्न रिङ्मो बस्ती विकास कार्यक्रम सञ्चालन गरिने उल्लेख गरिएको छ । जसका लागि १० करोड बजेट विनियोजन गरिएको सरकारले जनाएको छ ।
यस्तै, सङ्घ तथा प्रदेश सरकारको सह–लगानीमा हुम्लाको सदरमुकाम सिमकोटको पूर्वाधार विकास गरी मानसरोवर तथा कैलाशद्वारको रुपमा थप विकास गर्नेगरी कार्यक्रम संचालन गरिने प्रदेश सरकारले जनाएको छ ।
नेपालको एक आकर्षक पर्यटकीय गन्तव्यको रूपमा विकास गर्न हुम्लाको खार्पु सिमकोट (मानसरोवर प्रवेशद्वार)मा पनि नमुना एकीकृत पूर्वाधार विकास कार्यक्रमका संचालन गरिने छ भने त्यहाँ नमुना वस्ती निर्माण गरिने जनाइएको छ । त्यसका लागि १८ करोड बजेट विनियोजन गरिएको छ ।
यसैबिच, प्रदेश सरकारले सङ्घीय सरकारको सहकार्यमा दलित, विपन्न र सीमान्तकृत तथा अल्पसङ्ख्यक समुदायको आवास, निर्माणमा सहयोग गर्न सञ्चालित जनता आवास कार्यक्रमलाई अझै प्रभावकारी बनाउनेगरी काम थालनी हुने दाबी गरेको छ ।
सेवा प्रवाहलाई प्रभावकारी बनाउने उद्देश्यले कर्णाली प्रदेश सरकारका मन्त्रालयहरूको एकीकृत तथा आधुनिक भवन निर्माण गर्ने सरकारको लक्ष्य छ । प्रदेशभित्र सुरक्षित, व्यवस्थित र वातावरणमैत्री एवम् अपाङ्गमैत्री भवन निर्माण गर्नको लागि भवनसँग सम्बन्धित कानुन, संहिता तथा मापदण्ड तर्जुमा कार्य शुरु गरिएको छ ।
कर्णाली प्रदेश सरकारले भौतिक पूर्वाधार, यातायात तथा सहरी विकासका लागि यो बर्ष १० अर्ब ११ करोड ४२ लाख विनियोजन गरेको जनाएको छ । तर बर्षेनी काम नभएर रकम फिर्ता हुने गरेको देखिएको छ ।