सुर्खेत । कर्णाली प्रदेश सरकारका सामाजिक विकास मन्त्री घनश्याम भण्डारीले कर्णाली प्रदेशका विभिन्न स्थानहरूमा प्रादेशिक रणनीतिक अस्पतालहरू सञ्चालन गरिने बताउनुभएको छ ।
जनस्वास्थ्य सेवा कार्यालय सुर्खेतको आयोजनामा गरिएको जिल्लास्तरीय स्वास्थ्य क्रियाकलापहरुको वार्षिक समीक्षा तथा योजना तर्जुमा गोष्ठी साथै स्वास्थ्य चौकीहरूको न्यूनतम सेवा मापदण्ड सम्बन्धी समीक्षा कार्यक्रममा बोल्दै मन्त्री भण्डारीले अस्पतालको सेवा प्रवाह र सेवाग्राहीको अवस्थालाई अध्ययन गरी रणनीतिक अस्पताल तोकिने बताउनुभयो । त्यसका लागि आन्तरिक रूपमा तयारी समेत भइरहेको जानकरी दिनुभयो ।
सूचनाको हकको कार्यान्वयनमा ध्यान दिन बताउँदै उहाले सबै सरकारी कार्यालयले आफ्ना गतिविधिहरु त्रैमासिक, अर्धवार्षिक र वार्षिक रूपमा सार्वजनिक गर्नुपर्ने बताउनुभयो । समीक्षा कार्यक्रमबाट सरकारलाई सुझाव प्राप्त हुने अपेक्षा गर्नुभयो । त्यसका आधारमा आफ्ना तर्फबाट आवश्यकता अनुसार काम गर्ने प्रतिवद्धता जनाउनुभयो ।
विभिन्न तालिमबाट लिइएको ज्ञानलाई सेवाभावको मनसायबाट सेवा प्रवाह गर्न सुझाव दिनुभयो । सेवा प्रदान गर्दा नागरिक सन्तुष्टिको मापन गर्नुपर्ने बताउनुभयो ।
औषधिजन्य फोहोरमैला व्यवस्थापन, म्याद सकिएका औषधिको व्यवस्थापन, जनचेतनामुलक कार्यक्रम लगायतका विषयलाई ध्यान दिन आग्रह गर्दै कुपोषण जस्ता समस्या समाधानका लागि स्वयमसेविका लगायतका स्थानीय जनशक्ति परिचालन गर्नुपर्ने बताउनुभयो ।