सुर्खेत । असार सकिनै लाग्दा कर्णाली प्रदेशमा ७२ प्रतिशत धान रोपाईँ सकिएको छ । अझै २८ प्रतिशत रोपाई हुन बाँकी रहेको छ ।
कर्णाली प्रदेश सरकार भुमी व्यवस्था कृषि तथा सहकारी मन्त्रालय अन्तरगत कृषि निर्देशनालयका अनुसार कर्णालीभर हालसम्म ७२ प्रतिशत धान रोपाई भएको हो ।
प्रदेशका दश जिल्लामध्य डोल्पा जिल्लामा शत प्रतिशत रोपाई सम्पन्न भएको कृषि विकास निर्देशानलय सुर्खेतका सुचना अधिकारी टेकराज रेग्मीले जानकारी दिनुभयो ।
उहाका अनुसार कर्णालीमा कुल ४० हजार ८ सय ८४ हेक्टर क्षेत्रफलमा धान खेती हुने गरेको छ । त्यसमध्य असार २४ गतेसम्म २९ हजार २ सय ९८ हेक्टर क्षेत्रफलमा धान रोपाई सम्पन्न भइसकेको छ ।
जस अन्तरगत जुम्लामा ९६ प्रतिशत, हुम्लामा ९५ प्रतिशत, सल्यानमा ९० प्रतिशत धान रोपाई सकिएको छ ।
जम्मा क्षेत्रफलका हिसाबले सबैभन्दा ठूलो धान उत्पादन क्षेत्र रहेको सुर्खेतमा भने ६५ प्रतिशत क्षेत्रफलमा रोपाई भएको सुचना अधिकारी रेग्मीको भनाई छ । जिल्लाको १४ हजार ९ सय २१ हेक्टर क्षेत्रफलमा धान खेती हुन्छ त्यसमध्य हालसम्म ९ हजार ६ सय ९८ हेक्टरमा रोपाई सकिएको हो ।
यसैगरी, दैलेखमा ७ हजार ६२० हेक्टर जमिनमध्ये ४ हजार ३४३ हेक्टरमा मात्र रोपाई सम्पन्न भएको छ, जुन जम्मा ५७ प्रतिशत मात्र हो । जाजरकोटमा ६५ प्रतिशत, कालिकोटमा ७२ प्रतिशत, र रुकुम पश्चिममा ८० प्रतिशत रोपाई सम्पन्न भएको छ ।
कृषि निर्देशनालयका अनुसार वर्षा ढिलो हुनु, सिँचाइको पर्याप्त व्यवस्था नहुनु लगायतका कारणले केही जिल्लामा रोपाई ढिलो भएको हो ।